Главное

Объявления

Полезные ссылки

"Рœстдзинад", №58 (24340) 06.04.2017 

Сœ иртасœн куыстытœ — рœстœджы айдœн

Адœмы ивгъуыд кœнœ фидœныл дзургœйœ, йœ миддуне йын бамбарын œмœ хатдзœгтœ скœнынœн, œнœмœнг, фœхъœуы базонын, историйы цы фœд ныууагъта, йœ кœстœртœ йын цы аргъ кœнынц œмœ сомбонмœ цы хъуыдытимœ цœуы, уый. Уœззау у йœ уаргъ? Йœ удварны къœбицы исты бœркад ис, œви дзы дымгœ йœхицœн хъазœн фœз скодта? Уый бафœнддзœн œцœгœлоны базонын œмœ уœд, œнœмœнг, œркœсдзœн уыцы адœмыхатты тыххœй ахуыргœндтœ цы наукон куыстытœ скодтой, цы хатдзœгтœм œрцыдысты, уыдонмœ. Бœрнон хœс œвœрд ис, уыцы куыстœн йœ цард чи снывонд кодта, уыдоныл. Нœй сын бар фœрœдийын, мœнг ныхас ныффыссын, "нœ зонын" зœгъын… 

Уыцы ахсджиаг œмœ бœрнон хœсмœ куыд арœхсынц Цœгат Ирыстоны Абайты Васойы номыл гуманитарон œмœ социалон иртасœнты институты наукон кусджытœ, цы ногдзинœдтœ ис сœ куысты, уый фœдыл уыд нœ ныхас институты директор, историон наукœты доктор, профессор ХЪАНЫХЪУАТЫ Зœлинœимœ.

— Зœлинœ, дœс азœй фылдœр разамынд дœттыс Абайты Васойы номыл Цœгат Ирыстоны гуманитарон œмœ социалон иртасœнты институтœн. Цы уавœры йœ œрбаййœфтай, œмœ дзы уœдœй абонмœ цавœр ивддзинœдтœ œрцыд? 

— Институтыл  2019 азы сœххœст уыдзœн 100 азы, бирœ œвзарœнты сœрты ахызт, алы дуг дœр œм хаста йœхи ивддзинœдтœ. 2006 азы Уœрœсейы наукœты академи мœ размœ сœвœрдта хœс нœ иртасœнтœ аздахын, академи œппœт гуманитарон институттœн цы домœнтœ œвœрдта, уыдонмœ гœсгœ. Уый хуымœтœджы хъуыддаг нœ уыд, бахъуыд нœ куыстмœ стыр ивддзинœдтœ бахœссын, ног кусджытœ œрбахонын. Ахсджиаг хъуыддагыл нœхицœн банымадтам, 1925 азы институт цы наукон журналœн "Известия СОИГСИ" бындур сœвœрдта œмœ бирœ рœстœг рухс кœцы нœ федта, уый ногœй мыхуыры уадзын. Уœрœсейы наукœты академи бацамыдта нœ лœмœгъдзинад — монографитœ нœм фаг нœ уыд. Мœнмœ гœсгœ, уыцы хœслœвœрдтœ œнтыстджынœй сœххœст кодтам. Институт œрмœст монографион куыстытœ кœнынмœ йе 'ргом нœ аздœхта, фœлœ ма суанг нœхимœ байгом кодтам редакцион-рауагъдадон центр дœр. Уый нын нœ уавœртœ ноджыдœр фœуœрœхдœр кодта. 

Фœфылдœр аспирантурœйы дœсныйœдты нымœц дœр, сœрмагондœй байгом кодтам этнологийы хайад. Традицион систы, бындур цы ахсджиаг форумтœн сœвœрдтам, уыцы дунеон наукон конференцитœ: "Миллеровские чтения", "Нартоведение в ХХI веке", "Генеалогия народов Кавказа", œрыгон ахуыргœндты скъола-конференцитœ. Уыдонœй алкœцыйœн дœр ис хи рауагъдадон фœрœз. 

Кœй зœгъын œй хъœуы, аивтой кусджытœн сœ уавœртœ дœр. Институты бœстыхай тынг цалцœггœнинаг уыд. Кусœнуœттœ зымœг хъарм нœ кодтой, къултœ хъуынайы бын фесты. Бындурон цалцœгœн хъуыд бирœ œхцайы фœрœзтœ. 2014 азы нœ уавœрмœ йœ хъус œрдардтой УФ-йы Президенты œххœстбарджын минœвар Цœгат Кавказы федералон зылды Сергей Меликов œмœ нœ республикœйы уœды Сœргълœууœг Мамсыраты Таймураз. Зœрдиагœй бакуыстой, Цœцœнœй нœм цы кусджыты къорд œрцыд, уыдон. Фœлœ бœлвырд аххосœгты тыххœй куыстытœ афœдзмœ œрлœууыдысты, цалынмœ фарста йœхимœ нœ райста республикœйы Хицауады уœды Сœрдар Битарты Вячеслав. Уый йœхи хардзœй œрмœст цалцœггœнœн куыстытœ нœ сарœзта, фœлœ ма нын ногтœй раивта нœ кусœнуœтты мебель, архивы œмœ библиотекœйы чингуыты тœрхœджытœ. Абон нын ис œппœт уавœртœ кусынœн, стыр бузныг зœгъœм, ахъаззаг œххуыс нын чи бакодта, уыдонœн. 

 — Нœ дуджы цавœр иртасœн куыстытœ сты ахсджиагдœр, фыццаджыдœр цавœр фарстатœм дарут уœ хъус? 

 — Абон нœ наукон куыстытœн сœ сœйрагдœртœ сты комплексон иронзонынады  фарстатœ œмœ уырыссагау "алановедение" кœй хонынц, уыдон. Нœ археологтœ Дœргъœвсы кœнгœ ингœнты ракъахтыты ссардтой бирœ цымыдисаг œрмœджытœ алайнœгты астœуккаг œнусы историйœ, кœцытœ бœлвырд кœнынц, иннœ адœмтимœ сын цы бастдзинœдтœ уыд, уыдон. 

Этнологийы хайады иртасœм ирон адœмы традицион культурœ: œфсœддон, барадон, конфессионалон, гендерон œмœ œндœр хуызтœ. Ахсджиагдœр мœм кœсы, абон нœ адœмœн хъœугœдœр кœцытœ сты œмœ нœ республикœйы райрœзтмœ œххуысы хай цы традицитœ, этнокультурон брендтœ бахœсдзысты, уыдон иртасын.  

Ныртœккœ архайœм брендты системœ саразыныл, уый мидœг скœнын ирон рагон œрмгуыстгœнджыты сфœлдыстады тыххœй Интернет-проект. Уый руаджы нœ œрмдœснытœ сахуыр уыдзысты рагон сувенирон продукци хœрзхъœддœрœй кœнын œмœ œрмдœсныйад ногмœ аздахын.  

Фольклоры хайады кусынц аргъœуттыл, "Нарты кадджытыл", иртасынц, индоевропœйаг дунеимœ сœм иудзинадœй цы ис, уый. Литературœйы хайады кусджытœм œнхъœлмœ кœсы бындурон куыст — мыхуырмœ бацœттœ кœнын ирон литературœйы истори. 

Историктœ иртасынц рагон дунейœ ныры рœстœгмœ цы зœрдœхсайœн œркœсинаг фарстатœ ис, уыдон, уœлдайдœр сœ хъус дарынц трансформацион процесстœм. Политологтœн œмœ социологтœн сœ куысты сœр у нœ регионы нырыккон социалон œмœ политикон уавœрты мониторинг.  

Лингвисттœ кœнынц абарстытœ ирайнаг œвзœгтимœ, кусынц этнолингвистикœ œмœ  социолингвистикœйы фарстатыл. Œрœджы кœронмœ ахœццœ ирон-уырыссаг-англисаг дзырдуаты проект. У дыууœ томœй. Фыццаг ыл кусын райдыдта дзœнœтыбадинаг Гуыриаты Тамерлан, œмœ йœ кœронмœ ахœццœ кодта йœ чызг Гуытъиаты Эльмирœ. Ныртœккœ та кусы фразеологион дзырдуатыл. Хайады ма рауадзинаг сты хъуыддагкœнынады бœрœгуат œмœ œндœр дзырдуœттœ, монографитœ. 

Активонœй кусœм алайнœгты царды тыххœй иртасœнты райрœзтыл. Ам академион наукœйы сœйраг нысан у, истори зыгъуыммœгœнджытœн ныхкъуырд раттын, цœмœй сын адœмты кœрœдзиуыл ардауынœн фадат ма уа. 

—  Уœ институты кусджытœ хистœр кары сты œви фœсивœд дœр дœсны сты наукон-иртасœн куыстытœ кœнынмœ?

— Мœнмœ гœсгœ, мах хуызœн куыстуаты хъуамœ œмгуыст кœной œртœ фœлтœры минœвœрттœ. Аргъ кœнын хъœуы хистœр фœлтœры кусджытœн. Уыдон сœ фœлтœрддзинад, сœ куысты фарн хъуамœ фœхœццœ кœной астœуккаг кары фœлтœрмœ. Кœстœртœ та сты нœ райсомы бон œмœ хъуамœ сœхи фœлтœрой хистœрты зонындзинад œмœ куырыхондзинадыл. Хистœр кары наукон кусджытœй абон институты бирœ нал ис, фœлœ чи ис, уыдон кœнынц пайдайаг куыст. Сœ зонындзинœдтœ цœстуарзонœй дœттынц кœстœртœн: Цыбырты Людвиг, Дзаттиаты Руслан, Цыбырты Герлик, Фидараты Римœ œмœ Бесолты Еленœ. Астœуккаг фœлтœры минœвœрттœ кусынц œнтыстджынœй: Мœрзойты Исламбег, Туаллœгты Алан, Цориты Ингœ, Айларты Светланœ, Сокаты Дианœ, Мамиаты Изетœ, Гуœцœлты Ларисœ, Парсиаты Ларисœ, Багаты Алан, Еленœ Кобахидзе œмœ œндœртœ. Сœ архайдœй нын стыр ныфс дœттынц œрыгон кусджытœ. Уыдон се 'ппœт дœр сты наукœты кандидаттœ, алыхуызон премиты лауреаттœ (Уœрœсейы наукœты академийы, Европœйаг академийы, Абайты Васойы номыл премийы œмœ œндœрты), œппœтуœрœсеон грантты œркастыты уœлахиздзаутœ (уыдоны 'хсœн УФ-йы Президенты грант дœр), монографион куыстыты автортœ. Уыдон сты: Дзлиаты Дзерассœ, Дзапарты Елизаветœ, Абайты Фатимœ, Платы Зœринœ, Дауиаты Тамарœ, Бирœгъты Бэлœ œмœ œндœртœ.  Нœ œрыгон œмкусœг Борис Синанов сси РЦИ-Аланийы Сœргълœууœджы цур œрыгон ахуыргœндты советы сœрдар. Нœ къух цас амоны, уыйбœрц архайœм œрыгœттœн уавœртœ саразыныл: байгом кодтам Наукон-ахуырадон центр "Гуманитарий", уым кусœм студенттимœ, сœ хуыздœрты райсœм аспирантурœмœ, уыдонœй бирœтœ абон кусынц немœ. Уыдонœн уадзœм нœ журнал "Известия СОИГСИ. Школа молодых ученых". Сœ бон у чингуытœ лœвар ныммыхуыр кœнын проект "Первая монография"-йы фœрцы. Архайœм, нœ œрыгон наукон кусджытœн цœмœй фадат уа центрон институттœм стажировкœйы ацœуын, фœлœ, хъыгагœн, алкœд нœ къухы нœ бафты, уымœн œмœ уыцы хъуыддаг домы стыр хœрдзтœ.

— Уыдыстут фольклорон-этнографион экспедицийы Турчы, бабœрœг кодтат уым цœрœг ирœтты. Цавœр хатдзœгтимœ ссыдыстут? 

—  Турчы экспедицийы уыдыстœм 2013 œмœ 2015 азты Уœрœсейы гуманитарон наукон фонды гранты œххуысœй. Уырдыгœй цы œвœджиау œрмœджытœ œрбаластам, уыдон сты тынг цымыдисаг. Не 'мбœстœгтœ дунейы цœрджытœн равдыстой бафœзминаг хъуыддаг. Œцœгœлон адœмы 'хсœн œрцœргœйœ, хœларœй œрбынœттон сты сœ культурœйыл œнцой кœнгœйœ. Турчы цœрœг адœм сын кœнынц аргъ. Ис сœ кад, сты сын уарзон. Œцœгœлон бœстœйы цœргœйœ, бахъахъхъœдтой сœ фыдœлты культурœйœн йœ фылдœр хай, ахуыр кœнынц ирон œвзаг œмœ фидар хœцынц ирон œгъдœуттыл. 

Уым арфœйаг сты культурон-хœрзаудœн фонд "Алан Вакф"-ы бындурœвœрджытœ Хъаныхъуаты Ремзи, Хоситы Бурхан, йœ дарддœры разамонœг Абысалты Кая, диаспорœйы ныры сœргълœууœг Хъуысаты Садреттин œмœ йœ œххуысгœнджытœ Пухаты Зале, Œлбегты дыууœ хойы Лейлœ œмœ Сухейлœ, œмœ œндœртœ. Се 'хсœн ис, ирон œвзагыл кœсгœ œмœ фысгœ дœр Ирыстоны цœрœг бирœ ирœттœй хуыздœр чи кœны, ахœмтœ дœр. Нœ къухы бафтыд сœмбырд кœнын хъœздыг этнографион œмœ фольклорон œрмœг. Фидœны хъуамœ рауадзœм чиныг Турчы цœрœг ирœтты царды тыххœй.  

Сœрмагондœй мœ зœгъын фœнды Турчы цœрœг ирон фœсивœды тыххœй. Уыдон œнœзивœгœй Стамбулœн йœ иу кœронœй иннœмœ фœцœуынц ирон œвзаджы, ирон кœфтыты, зарджыты урочытœм.  

Œнœмœнгхъœугœ у Национ ахастдзинœдты министрады проект "Аланский след". Ацы проекты фœрцы Ирыстонмœ цы архайджытœ œрцыд, уыдон систы "Алан Вакф"-ы уœнгтœ. Уый нын ныфс дœтты, Турчы ирондзинад, ирон культурœ уидœгтœ кœй ауадздзœн. 

Турчы цœрœг ирœттимœ нын ис хœлардзинады бастдзинœдтœ. Кусœм иумœйаг проекттыл. Рауадздзыстœм туркаг-ирон дзырдуат, чиныг Хъаныхъуаты Есейыл йœ байзœддœгты курдиатмœ гœсгœ. Нœ зœрдœ дарœм, проект "Аланский след" дарддœр дœр œххœст кœй цœудзœн, ууыл. 

— УФ-йы œмœ фœсарœнты гуманитарон œмœ социалон иртасœнты институттимœ куыд бœттут уœ куыст? Цавœр бастдзинœдтœ ис уе 'хсœн?

— Œнгом профессионалон бастдзинœдтœ нын ис не 'мкусджытимœ Кœсœг-Балхъарœй, Цœцœнœй, Хъœрœсе-Черкестœй, Абхазийœ œмœ œндœр республикœтœй. Активонœй фœархайынц нœ мадзœлтты, сœ зонадон уацхъуыдтœ мыхуыр кœнынц нœ журналты, ис нœм иумœйаг проекттœ. 

Институтœн традицион ссис, рагœй хœлардзинады бастдзинœдтœ кœимœ дардта, уыцы фœсарœйнаг наукон центртимœ  œмгуыст кœнын. Ахœм бастдзинœдтœ нын ис Астœуккаг œмœ Дард Скœсœны институтимœ, Италийы Мачератœйы университетимœ œмœ Неополитайнаг университеты Скœсœны институтимœ, Испанийы Гранадœйы университет œмœ Барселонœйы автономон университетимœ, Цюрихы университетимœ, Кавказы культурœйы иртасœн куыстыты œмœ кœрœдзийœн œххуысы фондимœ, УФ-йы Ираны минœварады культурон хайадимœ œмœ иннœтимœ.  

— Цœуыл кусут абон та? Цавœр ног чингуытœ фœзындзысты чингуыты тœрхœгыл?

— Тагъд рœстœджы чингуыты тœрхœгыл фœзындзысты цымыдисаг куыстытœ: Мœрзойты Исламбеджы монографи "Эмиграция осетин в страны Северной Америки и Австралию", Цыбырты Людвиджы "Осетинская Нартиада. Мифологические истоки и ареальные связи", "Периодическая печать Кавказа об Осетии и осетинах. Второе дополненное и переработанное издание", Гутнаты Феликсы "Села Осетии", Фидараты Римœйы "Осетинский литературный процесс. Проблемы истории и теории", Еленœ Кобахидзейы "Центральный Кавказ в объединительной политике Российской империи второй половины XIX — начала XX в.", Цыбырты Алексейы "Иранство как предчувствие (Вопросы иранистики в трудах профессора М.И. Ростовцева)". Цыбырты Герликœн сцœттœ йœ чиныг "Дневник путешествия из пограничной крепости Моздок во внутренние местности Кавказа, предпринятого в 1781 году", Л.Л. Штедеры уацмыстœ Œмбалты Цоцкойы тœлмацœй немыцаг, уырыссаг œмœ ирон œвзœгтыл.  Œрыгон иртасœг Дзапарты Елизаветœ Тедтойты Зинœимœ рауагъта чиныг "М.Горький. Равзœрст уацмыстœ". Рацыд Гуыриаты Тамерлан œмœ Гуытъиаты Эльмирœйы "Ирон-уырыссаг дзырдуат"-ы фыццаг хай. Рацыдысты ма Миллеры номыл бакастыты œрмœджытœ œмœ œмбырдгонд "Генеалогия народов Кавказа: традиция и современность". Уый œххœст ранымад нœу, ис ма дзы ноджыдœр œндœр чингуытœ œмœ журналтœ. 

Уымœй уœлдай, институты наукон кусджытœн сœ иртасœн куыстытœ œппынœдзух рацœуынц раззагдœр наукон журналты, уыдонœй активонœй цитатœтœ хœссынц Уœрœсейы œмœ фœсарœнты ахуыргœндтœ. Бынœттон œмœ федералон экспертты œрбахонгœйœ, цœлхœмбырдœй œрныхас кœнœм сœрмагонд темœтыл, скœнœм политикон афœлгœстытœ œркœсинаг œмœ œрдзуринаг фарстатыл. Институтœн ис йœхи сайт, сœрмагонд фарстœ социалон сайтты, œмгуыст кœнœм дзыллон-хабархœссœг фœрœзты минœвœрттимœ. Уый тынг ахъаз у нœ куыстœн. Рœстœгимœ œмдзу кœнгœйœ, уайтагъд базонœм ногдзинœдтœ, иннœ бœстœты нын цы хœлœрттœ ис, уыдонимœ нœ хъуыдытœ, нœ ног œнтыстытœ кœрœдзийœн хъусын кœнœм.

— Зœлинœ, дœ фыд Хъаныхъуаты Валодя удуœлдайœ балœггад кодта ирон œвзагœн. Дœс œмœ ссœдз азы уыд газет "Рœстдзинад"-ы редактор. Абон дœр ма œмбисондœн баззадысты йœ куыстуарзондзинад, бœрнондзинад, йœ арф хъуыдытœ. Ды, куыд йœ фœдон œмœ œз, куыд йœ идейон œмкусœг цы уавœрты œмœ цы хуызы адарддœр кœниккам нœ куыст ирон дзырды сомбонœн, йœ бœллицтыл хъуыдыгœнгœйœ? 

— Ирон œвзаг уыд йœ  цард, йœ цин, йœ рис. Никуы мœ ферох уыдзœн, газет "Рœстдзинад"-ы тираж 30 минмœ куы схœццœ, уœд хœдзармœ цы цины œнкъарœнтимœ œрбацыд, уый. Зœххыл, цыма уымœй амондджындœр нœ уыд, афтœ мœм каст. Ирон œвзагœн йœ развœндагыл цœлхдуртœ куы уыд, уœд та-иу уыд тынг мœстджын. Ахœм бонтœ йœ царды бирœ уыд. Бœргœ, абонау йœ рœстœджы куы уыдаиккой Республикœйы Сœргълœууœджы цур ирон œвзаг бахъахъхъœнын œмœ йœ райрœзты фœдыл сœрмагонд къамис, Ирон œвзаджы бон, нысанмœарœзт республикон программœтœ, ЮНЕСКО-йы œнувыддзинад ирон œвзаджы хъысмœтыл кœнœ ирон œвзаг бœстон куы ахуыр кодтаиккой скъолаты, уœд мœ фыды амондœн кœрон нœ уыдаид. 

Уыцы рœстœджы адœмœн махœй зындœр уыд сœ мадœлон œвзаджы сœрыл œргом сдзурын, уымœн œмœ сœ уœд рахуыдтаиккой националисттœ. Зын ма уымœй уыд, œмœ суанг интеллигенцийы минœвœрттœй бирœтœ сœхœдœг дœр œргом дзырдтой, ирон œвзаг Елхотœй дарддœр нœ хъœуы, зœгъгœ. Уыцы ныхœстœм мœ фыд фырмœстœй калдта цœхœртœ. 

Абон рœстœг бынтон аивта. Ницы хъуаг стœм. Цы уœрœх гœнœнтœ нын ис, уыдонœй хъœуы раст спайда кœнын. Ирон œвзаг бахъахъхъœныны тыххœй бирœ мадзœлттœ арœзт œрцыд, фœлœ дзы ис, зœрœстонœй чи баззад, ахœм бынœттœ. Ноджы активондœрœй бавналын хъœуы грантты системœ œмœ сœрмагонд программœты руаджы канд наукон куыстытœ размœ кœнынмœ нœ, фœлœ ахуырадон, рухстауœн куыстытœ кœнынмœ. Ирон œвзаджы райрœзтœн ма ахъаз уаиккой медиа-проекттœ. Ис гœнœнтœ.

 

Читать pdf