«Рœстдзинад», № 73 (23623) 2014 азы 24 апрель
Абон œнœхъœн дунейы цœстœнгас дœр здœхт у Украинœмœ. Ам цы цаутœ цœуы, уыдон тасы œфтауынц алы сабырдзинадуарзœг адœймаджы дœр. Уœрœсемœ йе 'нусон знœгтœ, сœ сœргъы Америчы Иугонд Штаттœ, афтœмœй рагœй цыргъ кœнынц сœ дœндœгтœ, хъавынц œй ныппырх кœнынмœ, йœ адœмœй та цагъартœ саразын- мœ. Ацы хъуыддагыл тынг рагœй архайынц.
Æмбарынц фœсфурдаг политиктœ, Уœрœсейы тыхы, хœсты фœрцы байсœн кœй нœй, уый. Æмœ сœ сœйраг хотыхœн равзœрстой чъизи фœндаг — ардауœн мадзал. Архайынц Уœрœсейы мидœг алы адœмты кœрœдзимœ сныхмœ кœныныл, се 'хсœн сын фыдœхдзинад байтауыныл, œрыгон фœлтœрты œнœуаг митыл фœцалх кœныныл, мœнг культурœ œмœ сœ мœнг идеологийы цъымарайы ныппарыныл. Хъœуы нœ œмдыхœй, œмзондœй иумœ ацы чъизи нысанты ныхмœ œрлœууын, сœ цъаммар фœндтœ сœ хъуыры куыд фœбадой, ахœм ныхкъуырд сын радтын.
Ацы фарстайыл цыдис ныхас дыккаг дунеон наукон-практикон конференцийы. Йœ темœ уыд ахœм: "Стратегия на Кавказе в условиях региональной России нестабильности". Конференци бацœттœ кодтой Стратегион иртасœнты Уœрœсейаг институт œмœ Цœгат Ирыстоны Абайты Васойы номыл социалон œмœ гуманитарон иртасœнты институт иумœ.
Конференци байгом кодта уœлдœр амынд Стратегион иртасœнты уœрœсейаг институты директор Владимир Козин. Арфœйы ныхас конференцийы архайджытœн загьта социалон œмœ гуманитарон иртасœнты институты директор, профессор Хъаныхъуаты Зœлинœ. Конференцийы архайджытœ бœлвырд œрдзырдтой Кавказы абоны уавœрыл, регионы нывылдзинады рœзты процесстыл, бацамыдтой дины экстремизм œмœ терроризмы ныхмœ тохы фœндœгтœ, œрдзырдтой œддагон œмœ мидбœстон политикœ аразыны регионалон фœрœзтœй хуыздœр пайда кœныны гœнœныл. Æмткœй райсгœйœ, наукон-практикон конференцийы докладтœ œмœ раныхœсты мидис уыд ахœм: "Евроазиаг œмœ "Европœйаг" фœндœгтœ Хуссар Кавказы паддзахœдты политикœйы; Кавказы терроризмы œмœ экстремизмы идеологиты ныхмœ лœууын; нœ регионы дунеон организацийы архайд; Уœрœсейы энергетикон политикœ Кавказы".
Саутœты Тамилœ