«Рœстдзинад», № 223 (23288) 2012 азы 4 февраль

Цœгат Ирыстоны Абайты Васойы номыл гуманитарон œмœ социалон иртасœнты институты œмбырдтœаразœн залы уыд œрыгон ахуыргœндты II регионалон-дисциплинарон конференци «Наукœ – œхсœнадœн». Архайдтой дзы Дзœуджыхъœуы, Налцыччы œмœ Ростовы œрыгон ахуыргœндтœ, нœ республикœйы Хицауады, Парламенты œмœ Дзœуджыхъœуы наукон центры минœвœрттœ. 

Конференци байгом кодта œмœ œрыгон ахуыргœндтœн арфœтœ ракодта ЦИПУ-йы профессор, филологон наукœты доктор Хъамболты Тамерлан.

– Фыццаг конференци нœм дыууœ азы размœ уыд œмœ уœд йœ куыст œнтыстджын куы нœ рауадаид, бœлвырд наукон нысантыл биноныг бакусын куы нœ бацархайдтаиккой œрыгон ахуыргœндтœ, уœд абон дыккаг ахœм конфе¬ренци цœттœгонд нал œрцыдаид,  дзырдта уый. – Архайдзыстœм œрыгон ахуыргœндтœн œппœт фадœттœ дœр аразыныл, цœмœй сœ куыстытœ рœзой. Абоны œмбырды уын гœнœн фœуыдзœн кœрœдзимœ байхъусынœн, кœрœдзийы наукон бœрœггœнœнтœй хатдзœгтœ скœнынœн. Уымœй уœлдай, ацы конференцийы сбœрœг уыдзœн, наукон куыстытœ критикон цœстœнгасœй дœр равзарœн ис, уœлœмхасœн фарстатœ ма нœ куысты сœвзœрдзœн œви нœ. Æрыгон ахуыргœндтœ докладтœ бацœттœ кодтой œрдзон, бœлвырд œмœ гуманитарон наукœты кœцыдœр бœрœг тематикœйы. Тынг ахъаз сын сты наукон œмœ œхсœнады минœвœрттимœ фембœлдтытœ.

Конференцийы архайджытœн ма арфœйы ныхœстœ загьта, РЦИ-Аланийы Парламенты сœрдары фыццаг хœдивœг Къесаты Станислав.

Æрыгон ахуыргœндты II регионалон-дисциплинарон конференци арœзт œрцыд сœрмагонд программœ «Æрыгœттœн œххуыс»-ы фœлгœты. Уœрœсейы Наукœты академийы президиумы œххуысœй йœ бацœттœ кодтой нœ республикœйы Фœсивœды, физикон культурœ œмœ спорты хъуыддœгты фœдыл министрад, ЦИПУ, Дзœуджыхъœуы наукон центр œмœ РЦИ-Аланийы Парламенты наукœйы, культурœйы, ахуырады œмœ информацион политикœйы комитет.

Саутœты Тамилœ